Тропáрь страстотерпцу царю Николаю, глас 5

Цáрства земнáго лишéние,/ у́зы и страдáния многоразли́чныя/ крóтко претерпéл еси́,/ свидéтельствовав о Христé дáже до смéрти от богобóрцев,/ страстотéрпче вели́кий Боговенчáнный царю́ Никóлае,/ сегó рáди му́ченическим венцéм на небесéх,/ венчá тя с цари́цею и чáды и слу́ги твои́ми Христóс Бог,/ Егóже моли́ поми́ловати страну́ Росси́йскую// и спасти́ ду́ши нáша.

Кондáк страстотерпцу царю Николаю, глас 6

Надéжда царя́ му́ченика/ с цари́цею и чáды и слу́ги укрепи́,/ и к Твоéй любви́ окрыли́, бу́дущий им покóй предвозвести́вши,// тех моли́твами, Гóсподи, поми́луй нас.

Тропáрь царственным страстотерпцам, глас 4

Днесь, благовéрнии лю́дие, свéтло почти́м/ седмери́цу честну́ю цáрственных страстотéрпец,/ Христóву еди́ну домáшнюю Цéрковь:/ Николáя и Алексáндру,/ Алекси́я, Ольгу, Татиáну, Мари́ю и Анастаси́ю./ Ти́и бо, уз и страдáний многоразли́чных не убоя́вшеся,/ от богобóрных смерть и поругáние телéс прия́ша/ и дерзновéние ко Гóсподу в моли́тве улучи́ша./ Сегó рáди к ним с любóвию возопии́м:/ о святи́и страстотéрпцы,/ глáсу покая́ния и стенáнию нарóда нáшего вонми́те,/ зéмлю Росси́йскую в любви́ к Правослáвию утверди́те,/ от междоусóбныя брáни сохрани́те,/ мир ми́рови у Бóга испроси́те// и душáм нáшим вéлию ми́лость.

Кондáк царственным страстотерпцам, глас 8

Избрáнии Царéм цáрствующих и Гóсподем госпóдствующих от рóда царéй Росси́йских/ благовéрнии му́ченицы,/ му́ки душéвныя и смерть телéсную за Христá прии́мшии,/ и венцы́ Небéсными увенчáвшиися,/ к вам, я́ко покрови́телем нáшим ми́лостивым,/ с любóвию благодáрне вопиéм:/ рáдуйтеся, Цáрственнии страстотéрпцы,// за Русь Святу́ю пред Бóгом усéрднии моли́твенницы.

Величáние

Величáем вас,/ святи́и цáрственнии страстотéрпцы,/ и чтим честнáя страдáния вáша,/ я́же за Христá// претерпéли естé.

Молитва

О святы́й страстотéрпче царю́ му́чениче Никóлае! Госпóдь тя избрá Помáзаника Своегó, во éже ми́лостивно и прáво суди́ти лю́дем твои́м и храни́телем Цéркве Правослáвныя бы́ти. Сегó рáди со стрáхом Бóжиим Цáрское служéние и о душáх попечéние совершáл еси́. Госпóдь же, испыту́я тя, я́ко Иова многострадáльнаго, попусти́ ти поношéния, скóрби гóрькия, измéну, предáтельство, бли́жних отчуждéние и в душéвных му́ках земнáго цáрства оставлéние. Вся сия́ рáди блáга Росси́и, я́ко вéрный сын ея́, претерпéв и, я́ко и́стинный раб Христóв, му́ченическую кончи́ну приéм, Небéснаго Цáрства дости́гл еси́, идéже наслаждáешися Вы́шния слáвы у Престóла всех Царя́, ку́пно со святóю супру́жницею твоéю, цари́цею Алексáндрою, и цáрственными чáды Алекси́ем, Óльгою, Татиáною, Мари́ею и Анастаси́ею.

Ны́не, имéя дерзновéние вéлие у Христá Царя́, моли́, да прости́т Госпóдь грех отступлéния нарóда нáшего, и подáст грехóв прощéние, и на вся́кую добродéтель настáвит нас, да стяжи́м смирéние, крóтость и любóвь и сподóбимся Небéснаго Цáрствия, идéже ку́пно с тобóю и всéми святы́ми новому́ченики и исповéдники Росси́йскими прослáвим Отцá и Сы́на и Святáго Ду́ха, ны́не и при́сно и во вéки векóв. Ами́нь.