Цитаты из Библии

Молитвы пред и по чтении Евангелия

Молитва пред чтением Евангелия

Возсияй в сердцах наших, человеколюбче Владыко, Твоего Богоразумия нетленный свет, и мысленныя наши отверзи очи, во Евангельских Твоих проповеданий разумение. Вложи в нас и страх блаженных Твоих заповедей, да плотския похоти вся поправше, духовное жительство пройдем, вся, яже ко благоугождению Твоему, и мудрствующе и деюще. Ты бо еси просвещение душ и телес наших, Христе Боже, и Тебе славу возсылаем, со Безначальным Твоим Отцем, и Пресвятым и Благим и Животворящим Твоим Духом, ныне и присно, и во веки веков. Аминь.

Молитва святителя Иоанна Златоуста пред слушанием или чтением Священного Писания

Помни совет святителя Иоанна Златоуста: когда сядешь читать Священное Писание, то прежде помолись Богу, чтобы Он отверз твои очи сердечные.

Молись так: Господи, Иисусе Христе, отверзи мои очи сердечные услышати слово Твое и разумети и творити волю Твою, яко пришлец есмь на земли: не скрый от мене заповедей Твоих, но открой очи мои, да разумею чудеса от закона Твоего — скажи мне безвестная и тайная премудрости Твоея. На Тя уповаю, Боже мой, да ми просветиши и смысл светом разума Твоего, не токмо чести написанная, но и творити я, да не в грех себе святых жития и словеса прочитаем, но в обновление, и просвещение, и в святыню, и в спасение души, и в наследие жизни вечныя. Яко Ты еси просвещаяй лежащих во тьме, и от Тебе есть всякое даяние благо, и всяк дар совершен. Аминь.

Молитва Святителя Игнатия Брянчанинова

Спаси, Господи, и помилуй рабов Твоих (имена) словами Божественнаго Евангелия, чтомыми о спасении рабов Твоих. Попали, Господи, терние всех наших согрешений, и да вселится в нас благодать Твоя, опаляющая, очищающая, освящающая всего человека во имя Отца и Сына и Святаго Духа. Аминь

***

Господи, просвети очи мои сердечные светом разума Святого Евангелия Твоего.

Молитва по чтении Евангелия

Господи, Иисусе Христе Боже мой, словесами Божественного Евангелия Твоего излей благодать Твою на сердца сих рабов Твоих (имена) ко истреблению страстей и грехов их, и даруй им силу ко исправлению во Имя Отца и Сына и Святого Духа. Аминь.

Иная молитва по чтении Евангелия

Слава Тебе, Господи Царю, Сыне Бога живаго, сподобивый мя недостойнаго Божественная Твоя словеса и глас Святаго Евангелия Твоего слышати; сим убо владычним Твоим гласом, укрепи мя в покаянии настоящия сея жизни прейти нощь, от всякаго избавляя мя навета и злобы видимых и невидимых враг: Ты бо еси един сильный, и царствуяй во веки. Аминь.