Редкие Богослужебные тексты

по изданию: "Служба Господу Богу в Троице Славимому, в память Крещения Руси и святому равноапостольному князю Владииру с собором Киевских святых" вышедшего к 1000-летию преставления князя Владимира
Служба Собору Киевских святых.
Вечерня
Стихиры на «Господи, воззвах» , глас 4:
Яко звезды многосветлыя,/ светом велиим сияющия,/ на тверди небесней вас вемы,/ и яко бисер многоценный/ и камение блистающее,/ яко сыны дне,/ яко избранныя от рода русскаго,/ и яко поборники верных прославляем,\ совершающее вашу память, блаженнии.
Глас 1:
Радуйтеся, тучне=йшии го=ры киевския,/ усыре=нныя Духом,/ радуйся раю= насажденный безсмертных:/ в тебе бо благоволи/ водворитися Бог наш,/ обогащая тя чудес излиянии,\ яже преподобнии Твои источают.
Глас 8:
Велие торжество явися/ земли нашей/ в памяти святых, в той просиявших,/ темже восхваляющее их, глаголем:/ не забудите отечествия вашего,/ но всех нас поминайте,/ совершающих память вашу, святии,\ молящеся за нас ко Господу.
Слава, глас 2:
Озаряете земное отечество ваше всегда,/ славнии чудотворцы,/ якоже звезды светлыя,/ и избавляете е/ от озлобления врагов и всякия беды=./ Темже ра=достию празднуем/ ле=тнюю вашу память, блаженнии,/ верою и любовию поюще Господа,\ вас прославльшаго.
На стиховне
Слава, святых, глас 8:
Придите, восхвалим, вернии,/ Киевских святых велия исправления,/ имиже добре Творцу благоугодиша,/ и с Давидом Богу воспоим:/ зело честни быша нам/ друзи Твои, Господи,/ зело утвердишася/ начальства их в Тебе, Христе\ и Спасе душ наших.
Тропарь, глас 8:
Насадителя веры/ и князей киевских верховнаго/ днесь собор святых Киевских/ яко первоначальника своего восхваляет,/ апостола Андрея во благовестии подражателя,/ Кирилла и Мефодия/ трудов о просвещении продолжателя,/ блаженных Аскольда со Ольгою/ преемника во правоверии./ Темже и вси людие воспевают/ отца своего,/ верно вопиюще:/ Христа Бога моли/ мир отечеству нашему даровати,/ и душам нашим\ велию милость.
Ин тропарь, глас 5:
Ангельских чинов сомолитвенницы,/ преславнии угодницы Божии,/ града Киева/ и всея земли нашея/ всечудное украшение./ Господа присно молите/ даровати нам оставление грехов,\ и отечеству вашему велию милость.
Ин Тропарь, глас 6:
Предстателие страны нашея неусыпнии,/ ходатаи о нас ко Творцу непрестаннии,/ не презрите молений наших,/ но предваряюще на помощь,/ яко сродницы наши/ ускорите на молитву/ и потщитеся на умоление,\ предстательствующе присно о чтущих вас.

По 1-й стихологии седален, глас 2:
Солнце Правды Христос/ посла вас, якоже лучи,/ вселенную просвещающия,/ угодницы Его,/ от рода нашего возсиявшии./ Молите убо Его, святии,/ облежащий нас ныне/ облак неверия разгнати/ и даровати нам\ мир и велию милость.
По 2-й стихологии седален, глас 3:
Дерзай, Христова Церковь,/ и державствуй над всуе тебе борющими:/ Христови бо друзи/ о тебе попечение имут,/ заступающе тя во обстояниих./ Темже общий их праздник\ ныне совершаеши светло.
Величание: Ублажаем вас,/ чудотворцы наши славнии,/ землю нашу добродетельми вашими озаривши/ и образ спасения нам/ светоявленно показавши.
По полиелеи седален, глас 5:
В памяти святых Твоих, Господи,/ вси вернии празднуют,/ небеса радуются/ и земли нашея концы веселятся./ Тех молитвами/ даруй душам нашим\ велию милость.
На утрени
Канон, глас 8
Песнь 1
Воду прошед яко сушу, / и египетскаго зла избежaв, / изрaильтянин вопияше: / избaвителю и Богу нашему поим.
Многими содержими напастьми, к вам прибегаем, спасения ищущи, святи сродницы наша, от лютых бед и нужд спасите нас.
Страстей прилози и многия печали и беды обуревают нас, утешение нам подайте, святи, вашими к Богу молитвами.
Спаса Христа молите, Киевстии чудотворцы, избавитися нам от бед и скорбей, земли же нашей от варварскаго нахождения вашими теплым предстательством.
Богородичен: В скорби нас и бедах сущих посещения Божественнаго и промышления от Тебе сподоби, Богомати Владычице.
Песнь 3
Небеснаго круга/ Верхотворче, Господи, / и Церкве Зиждителю, / Ты мене утверди в любви Твоей, / желaний крaю, верных утверждение, / едине Человеколюбче.
Заступницы и покровителие земли нашея вы есте, Божии угодницы, направите нас ко пристанищу спасения, вы бо есте верным ограждение.
Молим вас, блаженнии: душевное смущение и печали бурю разорите и тишину нам подати начальника тишины Христа умолите.
Святым древлим подражавше и от Бога благодатию обогатившеся, помогайте нам, чадом вашим, присно восхваляющим вас, яко Божия угодники.
Богородичен: Лютыми недугами и страстьми греховными обуреваемым, и варварскими нападении истязуемым, и в ров погибели впадающим, Ты нам помози, Богородице Дево.
Седален, глас 2:
Моление теплое принесите, всехвальнии, к милости источнику Господу, о стране вашей молящеся, Богородицу Владычицу вкупе с собою подвигните на молитву и от бед избавите нас, всем вскоре предстательствующии.

Песнь 4
Услышах, Господи, / смотрения Твоего тaинство, / разумех дела Твоя / и прослaвих Твое Божество. Страстей наших смущение и многих бед бурю предстательством вашим ко Господу утолити потщитеся, святии.
Милосердия бездну прострите нам, блаженнии, призывающым вас на помощь, вы бо у милосердаго Бога дерзновение велие стяжали есте.
Надежду имуще вас, славнии, и яко стену недвижиму, к Богу ваши молитвы стяжавше, зол и всех бед избавляемся.
Богородичен: Исцели, Чистая, душевныя наша немощи и страсти телесныя, поспеши, Госпоже, здравие подати, врача всем рождшая Христа.

Песнь 5
Просвети нас повелении Твоими, Господи, / и мышцею Твоею высокою / Твой мир подaждь нам, Человеколюбче.
Исполнити веселия жизнь нашу, избавляюще нас от варварскаго нахождения и междоусобныя брани.
Избавите нас от бед, яко предстателие теплыя и молитвенницы о душах наших.
Отжените мглу прегрешений наших просвещением вашея светлости, светильницы божественнии и пресветлии.
Богородичен: Избави нас от бед, Богородице чистая, вечное рождши избавление и мир, всяк ум превосходящий.
Песнь 6
Молитву пролию ко Господу, / и Тому возвещу печали моя, / яко зол душа моя исполнися, / и живот мой аду приближися, / и молюся яко Иона: / от тли, Боже, возведи мя.
Молитвами вашими, блаженнии, утешение нам, в скорби сущим, испросите, и страну нашу от падений возставите, и люди расточенныя совокупите, в скорби, яко Иона, вопиющия: от бед наших, Боже, избави нас.
Заступники вас веемы, отцы приснопамятнии, и твердыя хранители земли нашея. Темже к вам прибегающе, милость приемлем и бед различных избавление.
Яко стену и пристанище стяжахом вас, святии, облегчение в скорбех, в бедах и напастех помощь, в болезнях исцеление и спасение душам нашим.
Богородичен: Заступницу Тя жизни вемы и твердую хранительницу, Дево, и искушений тучи разсеявающую, и бесов нападения отгоняющую, и молимся всегда: от гибельных страстей наших избави нас.

Кондак, глас 6:
Предстателие страны нашея неусыпнии,/ ходатаи о нас ко Творцу непрестаннии,/ не презрите молений наших,/ но предваряюще на помощь,/ яко сродницы наши/ ускорите на молитву/ и потщитеся на умоление,\ предстательствующе присно о чтущих вас.

Икос:
Восхвалити по единому кто возможет святыя Твоя Блаже, паче бо песка умножишася. Но Сам Владыко Христе исчитаяй множество звезд, и всем имена нарицаяй, прими всех их мольбы о нас, и яви щедроты Твоя на людех Твоих: вемы бо, яко много имут дерзновение к величеству Твоему, и ходатайствуют к тебе, яко приснии молитвенницы о душах наших.
Песнь 7
От Иудеи дошедше отроцы, / в Вавилоне иногдa, / верою Троическою плaмень пещный попрaша, поюще: / отцев Боже, благословен еси.
Наше спасение якоже восхотел еси, Спасе, устроити, прославил еси святыя сродники наша чудесы, имиже ко благочестию наставляеми, поем: отцев наших Боже, благословен еси.
Милостиваго умолите, святии, избавитися от прегрешений и душевных скверн верою зовущим: отцев наших Боже, благословен еси.
Сокровище спасения вы есте, Божии угодницы, и наставницы покаяния вопиющым: отцев наших Боже, благословен еси.
Богородичен: телесныя слабости и душевныя недуги, Богородительнице, любовию приступающих к Тебе, Дево, исцелити сподоби, Спаса Христа нам рождшая.

Песнь 8
Царя Небеснаго, / Егоже поют вои Ангельстии, / хвалите и превозносите во вся веки.
Помощи вашея требующыя не презрите, блаженнии, поющыя и превозносящия Христа во веки.
Неможение душ наших исцеляете и от телесных болезней возставляете, превозносящих Христа во веки.
Исцеления источаете, Божии угодницы, всех к вам притекающих с любовию и Христа превозносящих во веки.
Богородичен: Напастей Ты прилоги отгоняеши и страстей нападения, Дево. Темже Тя поем во вся веки.
Песнь 9
Воистинну Богородицу / Тя исповедуем, / спасеннии Тобою, Дево чистая, / с безплотными лики Тя величaюще.
Моление наше услышавше, честнии. Нечестие в земли нашей потребите, нах же всех во православии укрепите.
Радости сердца наша исполните, радости неизреченныя наслаждающиися, нашу греховную печаль потребляюще.
Во дни скорбных обстояний не оставите нас, предстателие наши и хранителие, но помощь скорую нам явите.
Богородичен: Пристанище и предстательство к тебе прибегающих буди, Дево, и стена нерушимая, прибежище же и покров и веселие.
Светилен
Подобен: Небо звездами:
В песнях светила земли нашея восхвалим, таинники Божественнаго Слова, Христа славяще, сих просветившаго и возлюбившаго, и помощники нам ко спасению давшаго.

Стихиры на Хвалитнах, глас 5:
Подобен: «радуйся»
Радуйся, Церковь верная,/ радуйся княже благоверный/ Владимире преславный,/ радуйся Ольго избранная,/ вы бо есте ко Владычице всех/ пе=рвейшии наши ходатаи,/ и начальницы православныя,/ и наставницы ко истинней вере./ Радуйся, граде Киеве,/ гражданы воспитавый Небеснаго Царствия:/ сии святая светила/ душам нашим явишася,/ сии чудес зарею,/ и делы, и знаменьми/ просияша во вся концы,/ и ныне Христу молятся/ подати душам нашим\ велию милость.
Радуйтеся, града Киева украшение,/ Церкве нашея непоколебимое утверждение,/ славо православных,/ чудес источницы,/ любве струи неистощимыя,/ светильницы многосветлии,/ Духа Святаго орга=ни,/ кротцыи и незлобивии,/ добродетельми укра=шении,/ человецы небеснии, земные ангелы,/ Христа друзи искреннии./ Того прилежно молите/ подати чтущим вас\ велию милость.

На Литургии:
Прокимен святых, глас 4: Радуйтеся, праведнии, о Господе, правым подобает похвала.
Стих: Буди, Господи, милость Твоя на нас, якоже уповахом на Тя.
Апостол: к Евреем зач. 330
Евангелие: от Матфея, зач.10.