Редкие Богослужебные тексты

Песнь 6
Ирмос: Божественное сие и всечестное / совершающе празднество / иконы ради Богоматере, / приидите руками восплещим, / от Нея рождшагося Бога славим.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Торжествующе ныне во храме Твоем, Пречистая, и Твоему припадающе честному образу, молим Тя умиленно: сотвори нас достойны быти лика празднующих, в торжестве избранных Сына Твоего.
Припев: Ангели дивятся величию Твоему, Всецарице, / и мы, брении, чудесем, / ихже иконою Твоею совершила еси.
Да рыдают демони, жегоми суще невещественным огнем от святыя иконы Девы Чистыя, и да бежат от человек в бездну, им уготованную: мы же веселящеся в песнех Препетую величаем.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Всецелебный Источниче, Богородице, зноем страстей палимую душу мою напой благодатными струями Сына Твоего, и услади горесть сердца моего зрением образа Твоего.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Слово Отчее рождшая, избави от безсловесия раба Твоего, и даруй ми, Благословенная, струи слезныя, да не постигнет мя плач неутешимый.
Ин. Ирмос: Пророка Иону подражая:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Якоже солнечными лучами паче просвещается: сице и днешнее торжество светозарнейшее является, озаряемое благодатными лучами иконы Твоея, Богорадованная, и всех нас радости исполняет.
Припев: Ангели славят промышление Твое о верных, / и мы поем Тя, явльшуюся нам на помощь Своим образом.
Якоже две маслины и два свещника, иже во откровении Иоанна, стоят пред Сыном Твоим и Тобою, Дево, праведнии родители Твои, ихже подобие на иконе Твоей веселит ны, убелажающия тех с Тобою.
Припев: Величай, душе моя, / благодать оставившую верным / во святых иконах Своих.
Якоже зритель чудес от святаго образа Твоего виде благодать Твою, целящую болезни и утешающую в скорбех: тако и нашим недугом подаждь цельбу и в скорбех утешение, Богоблагодатная.
Припев: Величай, душе моя / Прославившую благодатию чудес / Иерусалимскую икону Свою.
Якоже раб твой Нил сподобися зрети при иконе Твоей силу, спасающую от огня: тако и ныне, Госпоже, благодатию, присущею образу Твоему, храни храм сей и обитель от запаления и иных бед.
Ин. Ирмос: Молитву пролию ко Господу:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Призри, Дево, на Твоя недостойныя рабы, обстоящия Иерусалимскую икону Твою в Церкви Покрова Твоего и молебно возвещающия Ти печали своя: от тли греховныя, Нетленная, возведи ны.
Припев: Величай, душе моя, / Преблагословенную Марию, / освящающую ко иконе Ея притекающих.
Священное сокровище и неотъемлемое изволением Твоим имамы, грешнии, Иерусалимский образ Твой, Богоневесто, и Держимаго Тобою Вседержителя, у Негоже испроси нам силу благое исправляти.
Слава: Неисповедима сила Твоя и слава, Богородице: всяка душа верных Тобою хвалится и спасение получити уповает, яко Тя со святыми Иоакимом и Анною престательство имамы непреложное ко Пресвятей Троице.
И ныне: Радуйся, Мати Живота, благодати сподобляющая рабы Своя: радуйся освящение поющих державу Твою непобедимую и пресветлаго Лица Твоего и славных Богоотец честное подобие почитающих.
Кондак, глас 8:
Препрославленная Матерь Вышняго / созывает к песнопению нас / Своего образа пришествием от России, / и возбуждает зрением того на подвиг, / побеждати сопротивных силу, / и к Ней, яко нашея радости виновной, пети: / радуйся, Невесто Неневестная.
Икос:
Како отверзу бренная уста и воспою Небо Одушевленное, Деву Марию, от Неяже нам возсия Солнце Мысленное Христос, просвещаяй всякаго человека; недоумеет бо ум мой, безгласием язык связуется, но к чудес виновной тоя иконе зряще, ангельски воспоем глаголюще: радуйся, неистощимое Сокровище благодати: радуйся, Милосердия пучино. Радуйся, верным Божественное Услаждение. Радуйся, всем скорбящим Радосте. Радуйся, обидимых скорое Избавление: радуйся, Врачество, болезни вся исцеляющее: радуйся, в житейском море спасительное Окормление: радуйся, обуреваемым страстьми тихое Пристанище. Радуйся, Оружие, во брани мысленной противныя поражающее: радуйся, Молние, попалящее диавола. Радуйся, всех благих виновная человеком: радуйся, Миро благовонное всему миру. Радуйся, Невесто Неневестная.
Песнь 7
Ирмос: Не послужиша твари богомудрии / паче Создавшаго, / но огненное прещение мужески поправше, / радовахуся поюще: / препетый Отцев Господь и Бог благословен еси.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Не твари преклоняем колена, падоша бо истукани, но Тебе, во огни отроки Сохраншаго родившая: Тебе, образ Твой лобызающе, молимся, спаси ны от огня страстей, рукою отцев Бога Благословеннаго.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Кумирослужения умнаго избави мя, Богородице, истребляя души страстныя помышления, и сердца моего олтарь освяти Имени ради Сына Твоего, да воспою Ему: отцев Боже, благословен еси.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Похвалу обители Твоея составляет, и нас, рабов Твоих, радостно творит чудотворная Твоя, Владычице, икона, еяже ради ныне мы торжествуем, и Тя в песнех величаем, славяще отцев Бога Благословеннаго.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Исполни, о Дево, благих Твоих обитель, Гору и Россию, и всякому граду и стране потребная свыше ниспосылай, Ты бо еси Матерь небеси и земли Царя, и вся от Него елика просиши, восприемлеши в пользу рабом твоим.
Ин. Ирмос: Пещь, Спасе, орошаше:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Державным Покровом Твоим разрушавши зложелательныя советы врагов, тщащихся смущати рабы Твоя. Темже благодарственное пение приносим Тебе, Неусыпной Хранительнице нашей.
Припев: Ангели славят промышление Твое о верных, / и мы поем Тя, / явльшуюся нам на помощь Своим образом.
Вместилище сущи, Дево, мира и любве, братство наше, изволением Твоим собравшееся зде, храни в мирном устроении и единодушной любви, вышния жизни наследники ны творящи.
Припев: Величай, душе моя, / благодать оставившую верным / во святых иконах Своих.
Радуйся, монашествующих утверждение, и нас, рабов Твоих, Госпоже, ограждение, Еюже тлетворныя страсти разрушаются, недуги исцеляются и вернии спасение улучают, Еюже и мы уповаем спастися.
Припев: Величай, душе моя, / Прославившую благодатию чудес / Иерусалимскую икону Свою.
Радуйся, русская на Афоне обитель, радуйся, храме Покрова, в немже благоволи Владычице мира чудотворною иконою Своею пребывати и Державным Покровом Своим нас осеняти.
Ин. Ирмос: От Иудеи дошедше:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Воистину светлый есть сей праздник во храме Богоматере, идеже милосердием Ея от России возсия нам светозарная икона Ея.
Припев: Величай, душе моя, / Преблагословенную Марию, / освещающую ко иконе Ея притекающих.
Видевшии от образа Твоего знамения величаху Тебе, Матерь щедрот, и мы, грешнии, зрим и славим благость Твою в явлении зде иконы Твоея.
Слава: Всевышний Боже, Отче, Сыне и Душе, Троице Равночестная, молитвами Приснодевы подаждь нам мирное житие, непоколебимое и преклонное во благоделании.
И ныне: Имущая державу непобедимую, погуби, Мати Божия, от лица раб Твоих всю силу лукаваго врага и благодатию, присущею иконе Твоей, укрепи на невидимыя ополчения.
Песнь 8
Ирмос: Отроки благочестивыя в пещи / Рождество Богородичо спасло есть: / тогда убо образуемое, / ныне же действуемое, / вселенную всю воздвизает пети Тебе: / Господа пойте дела / и превозносите Его во вся веки.
Припев: Ангели Богоматерь прославляют, / и мы днесь славословим, чтуще Иерусалимскую икону Ея.
В пещи отроки орошает древле, и посреде огня - о чудесе! - сохраняет неопально Сын Твой, Дево, и ныне Тя, Матерь Свою, чудес творительну показует, да превозносим имя Твое во веки.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Рачители чистоты, пустынное сословие, монашествующих лицы, воспойте похвальная Деве Чистей Богоизбранней, и зря благодати причастный образ Ея, превозносите имя Ея во веки.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Триипостаснаго Божества Един Сый, от Тебе, Богоблагодатная, воплотися, Тя заступницу верным показа, темже не престай заступати и нас, поющих и превозносящих имя Твое во веки.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
В премирном ликуя свете, не презри нас, долу сущих во тме земной: но Ликом Своим призирая, призри и Матерним Благоутробием на рабы Твоя, и светом Сына Твоего, Владычице, отжени от нас мрачныя прилоги лукаваго.
Ин. Ирмос: Егоже ужасе ангели:
Припев: Ангели ублажают милосердие Твое к людям, / благодарим Тя и мы, Мати Божия, / празднующе иконе Твоей.
Уразумети Божиих судеб бездну и вся дела милосердия Твоего, Госпоже, к рабом Твоим несть мощно: темже славим Твое к нам Благоутробие и Сына Твоего Бога превозносим во веки.
Припев: Ангели славят промышление Твое о верных, / и мы поем Тя, / явльшуюся нам на помощь Своим образом.
Промышлением Твоим собранному зде стаду Твоему даровала еси, Дево, образ Твой, да озаряеши ны благодатию и от зол сохраняеши, сего ради славим Твое о нас смотрение, и Сына Твоего и Бога превозносим во веки.
Припев: Величай, душе моя, / благодать оставившую верным / во святых иконах Своих.
Како воспоем достойно днешния радости виновную, дары подающую притекащим к Ней и молящимся пред Ея пречистым образом? Тем славим Тоя к нам милосердие, и Сына Ея и Бога превозносим во веки.
Припев: Величай, душе моя, / Прославившую благодатию чудес / Иерусалимскую икону Свою.
Недоумением благодарити Тя, Благословенная, якоже подобает, како безпомощныя иногда обители сея явилася еси скорая помощница: славим убо Твое о нас промышление, и Сына Твоего и Бога превозносим во веки.
Ин. Ирмос: Ангели и небеса, на престоле:
Припев: Величай, душе моя, / Всемилостивую Владычицу, / иконою Своею обитати зде восхотевшую.
О Пренебесная Славо Марие! Кто возможет величия Твоя изъяснити, поведати чудеса Твоя и слышаны сотворити вся хвалы Твоя, на небеси и на земли Хвалимая во веки.
Припев: Величай, душе моя, / Преблагословенную Марию, / освящающую ко иконе Ея притекающих.
О Пресветлый Свете наш! Да знаменается на нас свет лица Твоего, Владычице, да во свете заповедей Сына Твоего ходяще, превозносим Его во веки.
Благословим Отца, и Сына, и Святаго Духа Господа.
О Пречистая Чистото, яже Святейшее Слово, собезначальное Отцу и Духови, рождшая! Всякия нас, Дево, измени скверны, да Пресвятую Троицу и Тя, Чистая, благословляем во веки.
И ныне: О неизглаголанная благосте! Кто не изумится благодеяниям Твоим, Богородице, изочтем бо, и паче песка умножатся, благодарим убо Тебе, Всеблагая, на небеси и на земли воспеваемая во веки.
Припев: Ангели благость к нам Пречистыя / зряще, удивишася, / како Дева вниде иконою во храм сей.

Песнь 9
Ирмос: Всяк земнородный / да взыграется, духом просвещаемь, / да торжествует же верных собрание, / почитающее икону Божия Матере, / подавающия вся нам потребная / и избавляющая от всякаго зла.
Припев: Ангели Богоматерь прославляют, / и мы днесь славословим, / чтуще Иерусалимскую икону Ея.
Радости виновна Ты еси и торжества нашего, Всепетая, икона бо Твоя озаряет смысл наш ко Твоему славословию, и возбуждает пети Тебе: Радуйся, Надеждо и Утверждение душ наших.
Припев: Ангели дивятся величию Твоему, Всецарице, / и мы, бреннии, чудесем, / ихже иконою Твоею совершила еси.
Собери разстоящая воедино, Мир мирови рождшая, Православие утверди непоколебимо и всех нас соблюди непреткновенных быти во исповедании Сына Твоего, верных Помощнице.
Припев: Ангели радуются славе Твоей, Дево, / веселимся и мы, дольнии, / припадающе ко иконе Твоей.
Тя Едину в женах Благословенную мы, грешнии, поюще молим: храни страну нашу и православных людей ея непобедимы от всех навет вражиих.
Припев: Ангели на небеси Тя, Богородице, воспевают, / и мы славим зде в дому Твоем, / лобызающе икону Твою.
Сердцем моим горя, пою Приснодеву, и недоумеваюся, аще благоволит пению устен грешника: но, Владычице, смиренно молю Тя, приими сию жертву хваления раба Твоего.
Ин. Ирмос: Светоносный облак:
Припев: Ангели ублажают милосердие Твое к людем, / благодарим Тя и мы, Мати Божия, / празднующе иконе Твоей.
Прибежище еси непостыдное уповающих на Тя, Богоневестная: находящих бо на ны искушений избавляемся, с верою призывающе Твое Матернее заступление.
Припев: Ангели славят промышление Твое о верных, / и мы поем Тя, / явльшуюся нам на помощь Своим образом.
Буди нам в нуждах промышление, в болезнех врачевание и от всяких зол свобождение, да благодарным сердцем и усты Тя, Дево, пред иконою Твоею славим.
Припев: Величай, душе моя, / благодать оставившую верным / во святых иконах Своих.
Ограждение твердое Афона явилася еси, Благая, и обители сея необоримый Покров: крепостию бо Державы Твоея храниши наследие Свое, низлагающи борющия ны.
Припев: Величай, душе моя, / Прославившую благодатию чудес / Иерусалимскую икону Свою.
Якоже древле спасла еси призывавшия Тя, Госпоже, тако и ныне Гору Твою и всю страну Российскую от всегубительства, глада, труса, потопа, огня, меча и иных бед.
Ин. Ирмос: Воистину Богородицу:
Припев: Величай, душе моя, / Всемилостивую Владычицу, / иконою Своею обитати зде восхотевшую.
Воистину Тобою человеческий род получи спасение, о Дево Марие: Ты бо соединила еси с человеком Бога. Сице и нас, грешных, ко Господу приближи, и присоедини к десным овцам Его, да со безплотными лики Тя величаем.
Припев: Величай, душе моя, / Преблагословенную Марию, / освящающую ко иконе Ея притекающих.
Небес пространнейшая Всецарице, сподоби нас на небеси быти в селениях праведных, и с теми наслаждатися лицезрения Твоего и рождшагося от Тебе Владыки всех, да со бесплотными лики Тя величаем.
Слава: Богоначальное Триипостасное Единство, Царю всех и Господи! Предстательством избранныя Тобою от всех родов Отроковицы негасимаго огня избави ны и сподоби недостойныя рабы Твоя со бесплотными лики Тя величати.
И ныне: Не отрини песнословия сего, приносимаго Тебе пред Иерусалимскою иконою Твоею, и молитвы наша принеси Сыну Твоему, да простив согрешения рабов Своих, оградит миром и любовию души наша.
Светилен
Свеще таинственная, Владычице Богородице, от святыя Твоея иконы благодатным светом возсияй на ны, грешныя, от мрака страстей избави, и безстрастия красоту подаждь душам нашим.
Слава, и ныне:
Кто Сия добра, яко луна, избранна, яко солнце? Сия есть Храм одушевленный Небеснаго Царя, Сия есть Палата Слова, со Отцем и Святым Духом славимаго во веки.

На хвалитех стихиры, глас 4:
Дал еси знамение смотрения о рабех своих, / образ Твоея Матере, Господи, / на немже и Сам Человеколюбче боголепно изображен еси. / К нему бо чувственно взирающе, / отводим ум наш от злых и суетных мечтаний, / и Твоим рачением вокриляеми, / Твое Имя присно воображаем, / Иисусе Всесильне, Спасе душ наших.
Храм одушевленный Небеснаго Царя Христа, / Тя, Пречистая, ведуще, / во храм Твой прибегаем, / и образ Светоподательный видяще, / к Тебе припадаем, Владычице, / и сердцем сокрушенным молим Тя / о спасении всех нас молити Твоего Сына, / Христа Человеколюбца, Спаса душ наших.

Яко пресветлая звезда / явися зде икона Твоя, Владычице, / юже благоволила еси нам даровати, / да Тобою просвещаемся, / поем и славим Тя, / Благословенную Матерь Сына Божия, / Иисуса Человеколюбца, Спаса душ наших.

Радуйся, Богохранимая обителе и храм сей, / яко внутрь тебе образ Пречистыя Богоматере / таинственно озаряет благодатию молящихся, / и всех нас радости исполняет, / сего ради вопиюще славим / Христа Человеколюбца, Спаса душ наших.

Слава, и ныне, глас 8:
Облаком небесным днем, / нощию же столпом огненным / путевождаше древле Бог в пустыне Израиля: / нам же вместо сих дарова святую икону Твою, Владычице, / паче огня и облака сияющую / не светом чувственным, но светом благодатным, / озаряющим наша душевная чувства, / и к Небу правый путь показующим, / слава Тебе о сем, Отче Небесный, / слава Тебе, Единородный Сыне, / слава Тебе, Святый Душе, / Троице Святая, слава Тебе!