Редкие Богослужебные тексты

С Л У Ж Б А
Собору святых, в земле Испанской и Португальской просиявших

НА ВЕЛИЦЕЙ ВЕЧЕРНИ
На Господи, воззвах: стихиры воскресны 4, и святых на 6.
Стихиры святых, глас 1:
Приидите, вси вернии,/ сущия в Испании и Португалии святыя восхвалим:/ иерархи и преподобныя,/ мученики и праведники,/ иже воистинну де́лы и словесы/ и всем житием Богу угоди́ша,/ и от Него многоразличными даровании чудес обогатишася,// и ныне молятся о душах наших.
Лик праведных Твоих, Господи,/ на Небесех украсися/ прославлением Иберийских святых собора,/ ихже и на земли Церковь воспевает,/ тех убо молитвы/ о нас приими, Человеколюбче,// яко имеяй велию милость.
Днесь Боголюбивии страны наша/ достоблаженных святых угодников просвещаются зарями,/ и Божия Церковь, цветы украшаема, вопиет к ним:/ угодницы Христовы и те́плии предста́телие,// моли́теся о любовию благохвалящих вас.

Ины стихиры, глас 4:
Яко лучу света испусти тя Солнце правды — Христос,/ просветити всю землю, апостоле славный Иакове,/ Божественными твоими молитвами озаряеши люди Иберийския/ и Божественным Светом невечерним всех просвещаеши,// любовию чтущих святую память твою.
Веселия духовнаго и радости неземныя/ исполняются ныне страны наша/ в благочестной памяти сынов и дще́рей своих,/ предстоящих во славе Небесному престолу всех Царя,/ ихже молитвами утверди Церковь Твою, Христе,// и людем низпошли велия и богатыя милости.
Жития земнаго треволнения преидосте/ и, достигше края умнаго желания,/ в Чертог Божественныя славы вселистеся;/ и ныне, радующеся со всех Царем и Богом,/ молитеся, яко да и мы вашего веселия причастницы будем,// ваш собор почитающии, всеблаженнии.
Слава, глас 6:
Престолу Трисолнечнаго Божества предстоящии/ и богатно осияваеми неприступными светлостьми,/ угодницы Божии всеблаженнии,/ нас, на земли любезно предстоящих/ и собор ваш днесь гласы воспевающих,/ страстей и бед свободите,// яко приснии к Богу ходатаи и молитвенницы о душа́х наших.
И ныне, Догматик воскреснаго гласа.
Вход. Прокимен воскресеный: Господь воцарися: Чтения три.
Ис 43:9–14.Сир. 44, 1–14. Прем. 3, 1–9.
На литии стихира святых, глас 8:
Званию Господа своего последующе,/ крест, аки жезл, в руце восприемше,/ не убоястеся страха, предстоящаго во тьме,/ но упованием преидосте к безбедному пристанищу/ и, подвигов своих обретше воздаяние,/ веселитеся во Свете неприступнем;/ темже вас почитаем, святии,/ яко присно молящих Христа Бога/ согрешений оставление даровати// празднующим любовию святую память вашу.
Слава, И ныне, Богородичен, глас тойже:
Испания о Тебе, Чистая, хвалится и веселится,/ Португалия славословит имя Твое, Дево Марие,/ имущи Тя Заступницу непостыдную/ и стену нерушимую,/ не оскудей и ныне, Владычице,// избавляти Твоя люди от всяческих бед.
На стиховне стихиры воскреснаго гласа.
Слава, глас 2:
Освященнии Божественным Духом,/ житие на земли скончали есте благочестно,/ Христу себе предавше и послуживше людем Божиим,/ святителие и преподобнии,/ мученицы, праведнии и вси, Богу угодившии,/ Толедо слава и Мадриду утверждение,/ Леону похвала и Сарагосы радование,/ Галисии и Наварры украшение,/ и Лузитании свет Христов облиставшии,/ Святей Троице ныне предстояще,/ о земли, идеже подвизастеся, молитеся,// и о всех, любовию чтущих память вашу.
И ныне, Богородичен, глас тойже:
О чудесе́ новаго, всех древних чудес!/ Кто бо позна́ Матерь, без мужа рождшую/ и на руку́ носящую всю тварь Содержащаго;/ Божие есть изволение Рождшееся./ Егоже яко Младенца Пречистая, Твоима рукама носившая,/ и, ма́терне дерзновение к Нему имущая,/ не престай молящи о чтущих Тя,// ущедрити и спасти ду́ши наша.

Тропарь, глас 4:
Огнь Божественный любве в сердце имеюще/ и чистоту стяжавше сердечную,/ Христовы веры хранителие,/ отечества земнаго добрии граждане,/ на земли были есте служителие Божественныя правды,/ душу и тело Богу предасте,/ молитеся усердно Господеви,/ да просветит нас благодатию Своею// и Царствия Своего причастники нас соделает.

Ин тропарь, глас тойже:
Приспе день светлаго торжества,/ людии Испанстии радуются,/ и с ними вся Португальская Церковь ликовствует/ во псалмех и пениих, и песнех духовных/ днесь бо, якоже солнце незаходимое, всем возсия память/ святых угодников и чудотворцев Иберийских;/ ихже молитвами, Господи,/ нас в Православии утверди// страны же наша во благочестии и мире сохрани.

НА УТРЕНИ
На Бог Господь: тропарь воскресный прилучившагося гласа, дважды. Слава, тропарь святых. И ныне, Богородичен: Еже от века утаенное: По кафисмах седальны воскресны с припевами и Богородичнами их.
Величание:
Величаем вас, / Испании и Португалии святии всехвальнии, / и чтим святую память вашу, / вы бо мо́лите о нас // Христа Бога нашего.
Псалом избранный:
1. Благо есть исповедатися Господеви и пети Имени Твоему, Вышний.
2. Род и род восхвалят дела Твоя и силу Твою возвестят.
1. Великолепие славы святыни Твоея возглаголют и чудеса Твоя поведят.
2. Радуйтеся Богу, Помощнику нашему, воскликните Богу Иаковлю.
1. Милости Твоя, Господи, во век воспою, в род и род возвещу истину Твою усты моими.
2. Милость же Господня от века и до века на боящихся Его.
Ипакои́ воскресен гласа.
Слава, седален святых по полиелеи, глас 8:
Стояще во храме Господни, / во дворех дому Бога нашего, / хвалите имя Всеславнаго и Предивнаго во святых Своих, / превозносите, людие, вочеловечшагося Господа, / даровавшему стране нашей таковых молитвенников, / ду́ши наша озаряющих светом благочестия / и сердца наша движущих // к славословию Живоначальныя Троицы.
И ныне, Богородичен, глас тойже:
Богородице Дево, / Вседержавная наша Царице, / омофором молитв Твоих весь мир покрывающая, / приими от благодарных сердец наших похвальныя песни сия / и испроси нам у Сына Твоего Спаса нашего // грехов прощение и велию милость.
Степенна, прокимен и Евангелие воскресны. Воскресение Христово видевше: Псалом 50. Слава: Молитвами апостолов: И ныне: Молитвами Богородицы: Стихира воскресна, глас 6-й: Воскрес Иисус от гроба:
Канон святым, глас 2.
Песнь 1. Ирмос: Грядите, людие:
Дре́ва жизни наслаждающеся и райское веселие восприимше, святии, / молите Человеколюбца вас восхваляющия спасти от всяких зол.
Веселися, земле Испанская, / апостольское благословение приявшая, ликуй и радуйся: / Иаков, сын громов и Богослова брат, под кров молитв своих тя приемлет / и людей в познании Христа наставляет.
До края земли евангельская проповедь достиже, / о нейже ныне торжествует Португалия, / яко плод сторичный с нивы своей Христу приносящи / — святых угодников в той просиявших.
Богородичен: Светлыми лучами Твоего Сына, Богородице, / просвети омраченную мою душу, / страстей смущение отжени, Твоими, Чистая, ходатайствы.
Песнь 3. Ирмос: На камени мя веры:
Троицу святых братиев прославим: / Леа́ндра и Иси́дора Богомудрых, имже хвалу Севи́лья поет, / Фульге́нция, Астиги пастыря пречуднаго, / с нимиже сестру их Флоренти́ну песньми венчаим: / монахинь дивную наставницу.
Брака́ры славу и свевов просветителя, / Гали́сии апостола и священный орга́н Духа Святаго, / Ма́ртина святителя премудраго воспоим любовию, / да его молитвами в добродетелех утвердимся.
Любовию ко Спасителю рода человеческого воспылавше, / Фруктуоз святитель честен со диаконы Авгурием и Евлогием, / востекли есте во след заповедей Его / и на огнь возшли есте дерзновенно.
Богородичен: Ангелов удивление, человеков дерзновение, Богородице Чистая, Приснодево, / моли Христа Бога, спасти непрестанно Тя блажащия.
Кондак святых, глас 3:
Возликуйте ны́не, Испание и Португалие, / ве́лиих даро́в ду́ховных сподобльшияся, / вас бо вемы святынь сокро́вищницу пречестную / и оте́чество возлю́бленное мно́гим святы́м. / Днесь к их по́мощи усе́рдно прибега́ем / и любовию вопием: / о святы́х ди́вный со́нме, / ва́шими уче́ньми и дея́ньми таже и страда́ньми за Христа́, / ду́ши на́ша просвети́те // и спасе́ния нам при́сно бу́дите хода́таи.
Седален святых, глас 6:
Святых Испании и Португалии восхвалим, вернии, / Христа Спасителя воспевающе: / сии бо во своем чину Богу угодиша, / Церковь добродетельми укра́сили есте, / и Спасу молятся очищение и оставление грехов даровати // верою память их совершающим.
Песнь 4. Ирмос: Пришел еси от Девы:
Португалии светильников воспоим, зовуще: / радуйся, Фла́вие, По́рто святителю всечестне и людей просветителю; / радуйся, отче Фруктуо́зо, просиявый в монашеских соборех, / Испании слава священная и Бра́ги похвало!
Смиренен сердцем и кроток и всем свят был еси, / повелению Христову последствуя, отче наш Осие, Кордобы похвала, / темже вселися в тя Божий Дух и премудрость, еюже и нас просвети.
Восхвали́ти достоит Ильдефонсо, мужа праведнаго, / монашествующих наставника кроткаго и Толедо пастыря чуднаго, / Богородицы служителя вернаго и молитвенника о душах наших.
Очищенную душу свою скорбию крепкою за люди твоя раздирая, / Оли́бо отче священне, Каталонии пастырю, / мира Божия провозвестник явился еси пред владыки земными, / но паче же молитвенник всеизрядный ко Пресвятей Троице.
Богородичен: Невесту Тя безневестну и чи́сто, Чистая Дево, селение Иисусово, / святейшую Херувим ве́мы, Марие Богородице.
Песнь 5. Ирмос: Света подателю:
Служитель Христов Викентий словом украшен, / за Спасову любовь закалается / и со Словом Превечным праведно царствует ныне, / веселия и славы Его насыщаяся.
Украшен багряницею твоих кровей, святителю Евло́гие, / и мастию священства, сияеши, таи́нниче, / со Леокри́цией всеславной и всеми мученики Ко́рдобы Христу зовеши, радуяся: / разве бо Тебе иного бога не знаем.
Воздвигл еси тебе сама́го священное жилище Духа Святаго, / Ферми́не священномучениче, га́ллов просветителю, / разорил еси храмы идольския, зовый: / разве бо Тебе иного бога не знаем.
Богородичен: Архангельский глас вопием Ти: / Радуйся, Благодатная, Господь с Тобою; / радуйся, Благословенная, Заступница наша и скорая в бедах Помощница.

Песнь 6. Ирмос: В бездне:
Нощь языческая прешла́ еси, заре евангельстей возвия́вши, / Христос бо — Солнце Правды три звезды у́тренния на небо церковное возводит: / Верисси́ма Богомудраго, Ма́ксиму чудную и Иу́лию блаженную: / Лиссабона славу и Португалии утверждение.
О Господе радуйся, Лузитания древняя! / яко в пределех твоих процвете Манций Эворский, / терпения и благочестия столп / и молитвенник теплейший.
Яко светильницы Богосия́нии просвещаете всех верных сердца, / мученицы честнии и братие Эмете́рие и Целедо́ние — Канта́брии похвало, / Иусте и Пасторе — отроцы Богомудрии, / и страстьми́ своими наставляете нас в любви Христовой.
Диадимою нетленною венча страдальческую главу твою Господь, / мучениче царевичу Ерминингельде, / веры ради подвизался еси даже до крове / и ныне царствуеши со Христом во веки.
Богородичен: Милости Твоея, Богородице, сподоби мя, премилостиваго Спаса рождшая, / Своею кровию от смерти вечныя человеки избавльшаго.
Кондак и икос воскресны.
Песнь 7. Ирмос: Богопротивное веление:
Одожде́нии Божественными угаси́ла еси многобожия пещь, / разже́гшеся Божественною любовию прерадостно, Евла́лие дево честна́я, / и ныне песнопое́ши со Леока́дией всеславной: / Иисус Господь, Сый благослове́н и препросла́влен.
Возжелавши Христовы красоты и Сего любовию снедаема, / страданием сочталася еси Ему и на брак Агнца возшла еси страданием / Энграция Богомудрая и всеславная.
Просвещшеся Троичным сиянием, идольское разрушили есте омрачение, / Иусто и Руфина — мучениц доблее сопряжение; / жизноносную бо смерть возлюбили есте за благочестие прияти, Христу вопиюще: / Иисус Господь, Сый благослове́н и препросла́влен.
Богородичен: Гавриилово благовестие услышавши, Марие Чистая, / прияла еси благоволение Отчее и Духа нашествие, / и родила еси Христа — Слово воплощенное, радуяся и вопиющи: / Иисусе, Сыне Прелюбезный, Сый благослове́н и препросла́влен.
Песнь 8. Ирмос: Пещь иногда:
Радуйтеся пустыни и горы Иберийския, / яко крин процветшия и иноков множество возрастившия! / Взыграйте, хваляще с нами Эмилиана Кукуллата и Викториана чуднаго, / вкупе же Беата блаженнаго / и Сатурнина со Фруктом, отшельников предивных.
Венеции и Далмации до́жа благочестиваго, / послежде инока обители Архангела смиреннаго, / Петра Орсеоло песньми почтим с Ромуальдом пустынолюбцем, / упованию на Бога и кротости от них поучающеся.
Землю Астурийскую проше́д, обители создал еси, / душу же свою соделал еси храм Святому Духу, / темже Небесную стяжал еси жизнь некончаемую, святителю Геннадие, / со Безплотными лики смесився в славословии Святыя Троицы.
Богородичен: Слово Отца Небеснаго Единосущное, / Адамово избавление от кровей Твоих девственных воплотися, Дево Марие Чистая, / Емуже благодарственне зовем: / благословите, вся дела Господня, Господа.
Песнь 9. Ирмос: Безначальна Родителя Сын:
Сердцем в молитве пламенея, Ангелом уподобилися есте еще на земли суще, / матери Богоблаженныя Сенорина и Ильдуара, Тигридия и Мелания, / ныне же прострите молебне ко Господу преподобныя своя руцы о молитвенниках ваших.
Господа от юности вашея возлюбили есте, матери святыя, / и ничтоже предпочли есте паче любве Его, / и ныне торжествуете в чертозех Триипостаснаго Божества, всечудныя.
В Небесных селех ныне водворяющеся, святии Иберии достославнии, / телесами же святыми землю сию освящаете и теми цельбы многоразличныя подаете, / всем любовия память вашу величающим.
Богородичен: Благословенную Марию Деву и Божию Матерь, приидите, вси вернии, любовию непрестанно восхвалим, Еяже ради обретохом вечное радование.

Светилен, глас 2:
Предстоще ныне Трисиянному Великому Свету/ и пребывающе в неизреченней светлости невечерняго дне,/ святии угодницы, помяни всех нас,/ память вашу светоносно совершающих.

На Хвалитех, стихиры воскресны 4 и святым 4, глас 4:
Обдержими есмы любовию/ восхвалити ваш собор, всечестни́и,/ вы бо хвали́ми есте от Бога и человеков,/ яко в жизни сей славу мира сего презресте,/ да исполните повеления Христова./ Вы же сотворите о нас молитву ко Господу // да причастники нас соделает Царствия любви Своея. Дважды.
Песнопение и хвалу приносим вам, Иберийских земель святии:/ разума светлостию украси́вшеся,/ заповедьми Божественными просветили есте ду́ши ваша,/ земная вся пренебрегше,/ к Богу Единому притекосте,// Егоже моли́те, да спасет ду́ши наша. Дважды.
Слава, стихира евангельская. И ныне, Богородичен: Преблагословенна еси:
Славословие великое и отпуст.
НА ЛИТУРГИИ
Прокимен святым, глас 4: Святым, иже суть на земли Его, / удиви Господь вся хотения Своя в них. Стих: Предзрех Господа предо мною выну, / яко одесную мене есть, да не подвижуся. Апостол: 1-е Соборное послание Иоанна, зачало 71: начало в 3-й главе, 1-м стихе: (Братие,) Видите, какую любовь: Конец в 10-м стихе: Сего ради явлена суть чада Божия, и чада диаволя. Евангелие от Матфея, зачало 11. Причастен: Радуйтеся, праведнии, о Господе, / правым подобает похвала.
МОЛИТВА
О, преподо́бнии и богоно́снии отцы́ на́ша, па́стырие и учи́телие, по́стницы и испове́дницы, земни́и а́нгели и Небе́снии челове́цы, вси святии Испанския и Португальския земли! К вам припа́даем, вам мо́лимся: не забу́дите нас, духовных чад ваших, бу́дите моли́твенницы о храме сем и о стране сей; мы же, яко немощны́ су́ще, ничто́же мо́жем твори́ти без ва́шего заступле́ния, про́сим предста́тельства ва́шего пред Го́сподом Бо́гом, в беда́х утеше́ния, в несча́стиях покрови́тельства, в оби́дах заступле́ния и во всех приключа́ющихся злых ра́дости и упова́ния на милосердие Божие, в добродетелех преуспеяние, любви умножение; те́мже не я́ко неключи́ми раби́, но я́ко ва́ши сы́нове да пребу́дем и моли́твами ва́шими жизнь ве́чную в Ца́рствии Христовом насле́дим. Ами́нь.