Молимся вместе. По соглашению друг за друга и с живой монастырской молитвой

Ежедневно в 11:00 совершаться Канон 14 000 Вифлеемским младенцам о кающихся в грехе детоубийства (аборт) матерей, отцов, родственников и знакомых, врачей и медперсонала в Свято-Пантелеимоновом женском монастыре.

Кто желает молитвенно присоединиться к этому молитвословию и келейно читать Канон 14 000 Вифлеемским младенцам в это же время - пишите в комментариях до 5-ти имен для их поминания другими присоединившимися участниками.

Кто пожелает усилить молитву - чтобы его имена поминали так же сестры монастыря - может отправить записку на Подать записку на Канон 14 000 Вифлеемским младенцам в Свято-Пантелеимонов женский монастырь.

Текст Канона ниже. 
Поминовение имен всех присоединившихся в заключительной молитве обязательно (имена см. в комментариях, а пишите в родительном падеже).
Бог в помощь!

За кого нужно возносить молитвы святым Вифлеемским младенцам:

• О женщинах, делавших аборт;
• О женщинах, которые думают о совершении аборта или рассматривают возможность аборта в будущем;
• О мужчинах, которые принуждали к аборту или не противились его совершению;
• О родных и близких, которые настаивали на убийстве во чреве матери, либо не противились этому;
• О врачах и медицинском персонале, принимавших участие в подготовке и проведении операции по умерщвлению ребенка в материнской утробе;
• О людях, участвовавших в создании и распространении лекарственных препаратов и оборудования для совершения аборта.

Канон святым мученикам 14000 младенцам, от Ирода во Вифлееме избиенным.

Пе́снь 1.

Ирмо́с: Предели́в пучи́ну чермну́ю Бог, фарао́на погрузи́вый в ней, прове́д Моисе́я немо́кренно в пусты́ню и одожди́в ма́нну в сне́дь лю́дем Изра́илевым, я́ко си́лен.

Звезда́ возсия́ в Вифлее́ме и Еде́ма от мра́чныя разреши́ кля́твы, и спасе́ния де́нь да́руется родонача́льником, из де́вственна о́блака просия́вый Иису́с, су́щих во тме просвеще́ние.

Три́знище дне́сь младе́нцев отве́рзеся ве́рным за Христа́ и Бо́га, враго́в облича́я нача́ла и вла́сти и И́родов облича́я му́жески младоу́мный гнев смы́сленно.

Богоро́дичен: Боже́ственное утвержде́ние и стена́ неруши́ма, Чи́стая, и мы́сленный мост при́сно, и необори́мь столп, и основа́ние, и покро́в, его́же ра́ди спаса́емся вси от бед — Ты еси́ вои́стинну.

Пе́снь 3.

Ирмо́с: Утвержда́яй гром и созида́яй дух, утверди́ мене́, Го́споди, да Тя пою́ и́стинно и творю́ во́лю Твою́, я́ко не́сть свят, я́ко Ты, Бо́же наш.

Де́вственною две́рию проше́д, Соде́тель и Бог наш пло́тский дом Себе́ созда́ неизглаго́ланно, и Младе́нец бы́сть, и во я́слех восклони́ся.

Све́рстницы, де́ти — страда́льцы Христо́ва воплоще́ния, И́родово неразу́мное ослепи́ша неи́стовство и о́чи всесве́тлии Це́ркве яви́шася.

Богоро́дичен: Из Тебе́ безо́тчий яви́ся, безма́терен пре́жде веко́в Госпо́дь, и зи́ждется преесте́ственно, и назда́ние да́рует су́щим из Ада́ма обоже́ния, Де́во Неискусобра́чная.

Седа́лен, глас 4.

Ро́ждшемуся дне́сь от Де́вы младе́нцев во́инство я́ко Творцу́ и Царю́ прия́тная прино́сятся заколе́ния, предложе́нная Христу́ ве́ры ра́ди.

Сла́ва, и ны́не: Удиви́ся, уве́дев, И́род, ца́рь лю́тый, ища́ я́ростию, проти́ву боря́ ро́ждшемуся на земли́ Царю́, ю́ному Христу́, и, боя́знию и стра́хом мно́гим содержи́мь, посыла́ет во́инство уби́ти с я́ростию де́ти, в Вифлее́ме младе́нствующия, ку́пно с ни́ми уби́ти покуша́яся Созда́теля, за благоутро́бие обнища́вшаго: из де́вственныя бо утро́бы произы́де, спасти́ хотя́ род наш.

Пе́снь 4.

Ирмо́с: Услы́шах слух Твой и убоя́хся, проро́к глаго́лаше, разуме́х дела́ Твоя́, и диви́хся, и возопи́х: сла́ва си́ле Твое́й, Го́споди.

Де́ва и не́бо, небе́сныя и земны́я, Рождество́м хода́тайствовавши, па́че ума́ примири́ и вражды́ средосте́ние разори́.

Младе́нец мно́жество му́ченически, по Бо́зе всех пострада́вше, по́чести страда́ния от Него́ прие́млет: и́хже ра́ди И́род весьма́ устыде́ся.

Богоро́дичен: Боже́ственное Сло́во во утро́бе заче́нши, стра́шным Сло́вом па́че сло́ва породила́ еси́ пло́тию, Всенепоро́чная, те́мже Тя, Богоро́дицу, сла́вим.

Пе́снь 5.

Ирмо́с: Возсия́й ми, Го́споди, свет повеле́ний Твои́х, я́ко к Тебе́ дух мой у́тренюет и пое́т Тя: Ты бо еси́ Бог наш, и к Тебе́ прибега́ю, Царю́ ми́ра.

Чу́вственное у́бо со́лнце о́блаки покрыва́ется, У́мное же и Всеневеще́ственное, безме́рным благоутро́бием в пло́ть оде́явся, в верте́пе дне́сь пелена́ми повива́ется нас ра́ди.

Скверноуби́йства кровьми́ И́род оскверня́ется: Влады́ку бо всех, Бо́га и Царя́, уби́ти покуша́яся, на о́троки неи́стовствует и свире́пствует лю́те.

Богоро́дичен: Заре́ю моли́твы Твоея́, Богороди́тельнице Чи́стая, слепоту́ се́рдца моего́ озари́, я́ко еди́на свети́льника Го́спода и сла́вы со́лнце возсия́вши Христа́.

Пе́снь 6.

Ирмо́с: Бу́ря мя мно́гих согреше́ний мои́х потопля́ет, и изнемога́ет дух мой; но Ты, Го́споди, я́ко ми́лостив, сшед, возведи́ живо́т мой.

Боже́ственное воплоще́ния Сло́ва соверша́ется дне́сь та́инство, Богоро́дице: Тобо́ю бо яви́ся пло́тию Бог Преве́чный, да обожи́т прия́тие.

Рахи́ль, у́бо чад пла́чущи, дре́вле провозвести́ за Христа́ младе́нцев, прие́мших безго́дное заколе́ние; тем и отрица́шеся, уте́шитися не хотя́щи.

Богоро́дичен: Боже́ственное Рождество́ Твое́, Всесвята́я, прозя́бшую пресече́ в раи́ кля́тву и, стезю́ дре́ва жи́зни челове́ком отве́рзши, благослове́ние источи́.

Конда́к, глас 4.

Звезда́ волхвы́ посла́ к Ро́ждшемуся, и И́род непра́ведное во́инство посла́ лю́то, уби́ти мня во я́слех я́ко Младе́нца лежа́ща.

Пе́снь 7.

Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Весели́тся дне́сь Вифлее́м с на́ми, Тя бо, Невмести́маго, в верте́пе прие́млет, — благослове́н еси́, — вопия́, — еди́н Бог оте́ц на́ших.

Незло́бива же́ртва и нескве́рная за Тя предзакала́ется, Бо́жий Сло́ве, вопию́ще: благослове́н еси́, Го́споди, Бо́же оте́ц на́ших.

Богоро́дичен: Ра́дуйся, небу́рное покая́ния приста́нище, в не́же прибега́юще, Богоро́дице, зове́м: благослове́на еси́ Еди́на, ро́ждшая Бо́га оте́ц на́ших.

Пе́снь 8.

Ирмо́с: Вся́ческая, Влады́ко, прему́дростию Твое́ю соста́вил еси́, земли́ же па́ки утверди́л еси́, я́коже ве́си, дно, основа́нием водрузи́вый на вода́х безме́рных. Тем вси вопие́м, воспева́юще: благослови́те, дела́ Госпо́дня, непреста́нно Го́спода.

А́нгели сла́вят вла́сть Ро́ждшагося, па́стырие чудя́тся, и волсви́ покланя́ются, небеса́ возвеща́ют звездо́ю Зижди́теля; с ни́миже вси, воспева́юще, вопие́м: благослови́те, дела́ Госпо́дня, Го́спода.

Мно́жество неискусозло́бное во́инствует Влады́це дне́сь кро́вию и на И́рода тве́рдо вооружа́ется, Тебе́, Христе́, ро́ждшуся. Тем вси вопие́м, воспева́юще: благослови́те, дела́ Госпо́дня, Го́спода.

Богоро́дичен: Де́ву Тя, Чи́стая, храм, и две́рь, и о́блак, купину́ неопали́му, и ста́мну ма́нны, и жезл прозя́бший, киво́т, и све́щник, и скрижа́ли заве́та, го́ру святу́ю, из нея́же ка́мень отсече́ся, проро́цы Бо́жии пропове́даша.

Пе́снь 9.

Ирмо́с: Я́ко сотвори́ Мне вели́чия Си́льный и свя́то и́мя Его́, и ми́лость Его́ в род и род боя́щимся Его́.

Ве́сь в Тебе́ вмеща́ется, И́же в не́дрех сый Отца́, и зи́ждется Зижди́тель небесе́, и истощава́ется мене́ ра́ди, и, в пелена́х пови́вся, разреша́ет прегреше́ний плени́цы.

В Ра́ме слы́шася Рахи́ли го́рькое рыда́ние, пла́чь же, и увы́, и сокруше́ние: скверноуби́йца бо враг, на ча́да Вифлее́мская, И́род показа́ся.

Богоро́дичен: Рождество́м Твои́м, Де́во, обожи́хомся, сме́ртнии: Бо́га бо, Пита́теля всех и единосла́вна Отцу́, и ражда́еши, и млеко́м пита́еши. О, стра́ннаго чудесе́!

Свети́лен.

Зла́чную ни́ву младе́нец, богобо́рствуя И́род, посла́в, незре́лую пожа́, окая́нный, и, ро́ждшагося Го́спода не возмо́г уби́ти, вся́каго сра́ма исполня́ется.

Молитва
О святии мученицы, младенцы Вифлеемстии, от Ирода за Христа нещадно убиеннии!
Вы душами вашими на Небеси Престолу Божию предстоите и Триипостасныя Его славы наслаждаетеся, телесы же святыми на земли в Божественных храмех почиваете и данною вам свыше благодатию различная чудеса источаете! Призрите милостивными вашими очесы на предстоящии люди (Имена), пред честною вашею иконою и святыми мощами умильно молящияся и просящия от вас целебныя помощи и заступления: прострите ко Господу Богу нашему теплыя ваша молитвы и испросите душам нашим оставление согрешений. Се бо мы, за беззакония наша не смеющее возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным вас, ходатаев милостивых ко Владыце и молитвенников за ны, грешныя, призываем, яко вы прияли есте благодать от Него недуги отгоняти и страсти исцеляти. Вас убо просим: молитеся о всех непраздных, во чреве имущих, и о чадех их, во еже увидети им свет чувственный, да и умного света, еже во святем крещении, сподобятся; не презрите нас, недостойных, молящихся вам и вашея помощи требующих. Будете нам в печалех утешителие, в недузех лютых страждущим врачеве, напаствуемым скорые покровителие, очесем недугующим прозрения датели, ссущим и младенцем в скорбех готовейшии предстатели и исцелители; исходатайствуйте всем вся, яже ко спасению полезная, яко да вашими ко Господу Богу молитвами получившее благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа ныне и присно и во веки веков. Аминь.